बोइजतर्फ नेपालको सान्त्वना जित, महिला पराजित

नेपालले घरेलु मैदानमा जारी एटिएफ यु–१२ टेनिस टिम प्रतियोगिता (दक्षिण एसियाली क्षेत्रीय छनोट) को बोइजमा बुधबार जित निकालेको छ।

सातदोबाटोस्थित टेनिस कम्प्लेक्समा जारी प्रतियोगितामा नेपालले बुधबार बोइजमा भुटानमाथि ३–० को सान्त्वना जित निकाल्दा गल्र्समा भने पराजित हुन पुग्यो।

चार राष्ट्र सम्मिलित समूह ‘बी’ मा नेपालको यो पहिलो र सान्त्वा जित पनि हो। यसअघि नेपालले श्रीलंका र पाकिस्तानसँग हार बेहोरेको थियो। जितका बावजुद नेपाल प्रतियोगिताबाट बाहिरिएको छ। भुटानविरुद्ध सिंगल्समा नेपालका विश्वविशेष डल्लाकोटी र निश्चल ज्ञवालीले सफलता प्राप्त गरे। विश्वविशेषले डुडु तेन्जिङलाई ६–० र ६–३ ले हराए।

अर्को सिंगल्समा निश्चल ज्ञवालीले पेल्थोप छिरिङलाई ६–२ र ६–३ को सोझो सेटमा पराजित गरे। डबल्समा नेपालका विश्व र साहनावाज आलमको जोडीले पेल्थोप र मिफाम छिरिङको जोडीलाई ६–० र ६–२ को सेटमा हरायो।

नेपाल टेनिस संघद्वारा आयोजित प्रतियोगिताको बोइजमै बुधबार पाकिस्तानले श्रीलंका र भारतले बंगलादेशलाई समान ३–० ले हराए। बुधबारको खेलसँगै बोइजमा सेमिफाइनल समीकरण पूरा भएको छ। सेमिफाइनलमा भारतको भेट श्रीलंकासँग हुँदा पाकिस्तानले बंगलादेशको सामना गर्नेछ।

गल्र्समा भने नेपाल श्रीलंकासँग ३–० ले सहजै पराजित भयो। सिंगल्समा नेपालकी सारा पन्त र अनुश्री धोजु सहजै पराजित भए। श्रीलंकाका लियङ सानुथी वोङले नेपालकी सारालाई ६–० र ६–० ले हराइन्।

अर्को सिंगल्समा अनुश्री पनि श्रीलंकाकी दाम्सिलुनी सहन्सासँग ६–० र ६–१ को सोझो सेटमा पराजित हुन पुगिन्। डबल्समा श्रीलंकाका लियङले हेवासाम पथिराजाको जोडीले अनुश्री र आयुशा जिसीको जोडीलाई ६–४ र ६–३ को सेटमा पराजित ग¥यो। नेपालको यो लगातार तेस्रो हार पनि हो।

यसअघि नेपाल बंगलादेश र भारतसँग पराजित भएको थियो। नेपाल मंगलबार भारतसँग ३–० ले पराजित भएको थियो। प्रतियोगितामा बोइजतर्फ सात र गल्र्समा पाँच राष्ट्रले प्रतिस्पर्धा गरिरहेका छन्।

बोइज/गल्र्स दुवैमा फाइनल पुग्ने दुई राष्ट्र काजाकिस्तानमा सेप्टेम्बरमा हुने एटिएफ यु–१२ टिम प्रतियोगिताका लागि छनोट हुनेछन्। शुक्रबारसम्म चल्ने प्रतियोगिताका खेलहरू सातदोबाटोस्थित टेनिस कम्प्लेक्समा भइरहेका छन्।