कालीकोट दुर्घटनामा गम्भीर घाइते तीन जनालाई थप उपचारका लागि सुर्खेत लगियो

कालीकोटको हाउडीमा जिप दुर्घटना हुँदा घाइते भएका सात जनामध्ये गम्भीर तीन जनालाई थप उपचारका लागि सुर्खेत लगिएको छ ।

दुर्घटनामा परेका गम्भीर घाइते भएका पूजा शाही, देवदत्त आचार्य, विजया शाहीलाई हेलिकोप्टरमार्फत् सुर्खेत लगिएको हो ।

अन्य घाइतेको भने जिल्ला अस्पताल कालीकोटमा उपचार भइरहेको प्रहरी प्रमुख डिएसपी अर्जुन केसीले बताए । एक जनाको अवस्था सामान्य रहेकोले गाउँमै उपचार भएको छ ।

सुर्खेतबाट कालीकोटको शुभकालिका गाउँपालिका आउँदै गरेको जिप वडा नं ६ को हाउडी खोलामा दुर्घटना हुँदा ७ जना घाइते भएका थिए ।

घाइते हुनेहरू सबै वडा नं ६ हाउडीकै रहेका छन् । कर्णाली प्रदेश ०२–००१ च ०७९७ नम्बरको गाडी दुर्घटना भएको प्रहरीले जनाएको छ ।