काँक्रेविहारमा पर्यटन महोत्सव आयोजना हुँदै

काँक्रेविहारमा खोज, अनुसन्धान तथा पर्यटन महोत्सव आयोजना गरिने भएको छ । कर्णाली प्रदेशको राजधानी सुर्खेतमा रहेकाे काँक्रेविहारमा ऐतिहासिक, धार्मिक, पुरातात्त्विक, सांस्कृतिक पक्षको गहन अध्ययन, समीक्षा र प्रचारप्रसार गर्ने उद्देश्यले उक्त महोत्सव आयोजना गर्न लागिएको हो ।
विहिबार वीरेन्द्रनगर–९ को आयोजनामा काँक्रेविहार परिसरमै काँक्रेविहार खोज, अनुसन्धान तथा पर्यटन महोत्सव’ तथा युवा बालबालिका तथा विद्यार्थी सम्मेलन’ आयोजना गरिने जानकारी दिइएको छ।

वीरेन्द्रनगर–९ का वडाध्यक्ष ऋषि गिरीका अनुसार, यस महोत्सवको मुख्य उद्देश्य काँक्रेविहारलाई शैक्षिक विमर्श, बौद्धिक अन्तर्क्रिया तथा सांस्कृतिक अभिव्यक्तिको साझा मञ्च बनाउनु हो ।
महोत्सवमा काँक्रेविहारसम्बन्धी विविध महत्वपूर्ण कार्यपत्र प्रस्तुत गरिने, विद्वानहरूको टिप्पणी, खुला बहस तथा विचार–विनिमय कार्यक्रम सञ्चालन गरिने बताइएको हाे ।
महोत्सवमा विभिन्न विद्यालयस्तरीय प्रतियोगिताहरू पनि आयोजना गरिनेछन् ।

जसअन्तर्गतः

• वक्तृत्वकला प्रतियोगिता कक्षा ९–१२
• चित्रकला प्रतियोगिता – ‘सपनाको काँक्रेविहार’ शीर्षकमा कक्षा ६–८
• नृत्य प्रतियोगिता – स्थानीय कला–संस्कृति झल्किने प्रस्तुतिहरू कक्षा १–५

यसबाहेक, समाजका विभिन्न क्षेत्रहरूमा योगदान पुर्‍याएका व्यक्तिहरूलाई सम्मान गरिनेछ। विद्यालयस्तरीय विज्ञान तथा शैक्षिक प्रदर्शनी स्थानीय थारू, भोटे तथा अन्य आदिवासी समुदायको सांस्कृतिक प्रस्तुति पनि महोत्सवमा समावेश गरिनेछ ।
वडा कार्यालयका अनुसार, यस्ता गतिविधिहरूले स्थानीय समुदायमा सांस्कृतिक स्वामित्वको भावना बलियो बनाउनेछ भने आन्तरिक पर्यटन प्रवर्द्धनका लागि नयाँ सम्भावनाहरू खोल्ने अपेक्षा गरिएको छ ।