पाँच जिल्लामा अर्बौंको क्षति

सरकारी र निजी गरी ४५ वटा सवारी साधनमा क्षति

भदौ २३ र २४ गते भएको जेन–जी आन्दोलनका क्रममा कर्णालीका सुर्खेतसहित पाँच वटा जिल्लामा क्षति पुगेको छ । आन्दोलनका क्रममा जाजरकोट, हुम्ला, दैलेख, सल्यान र रुकुम पश्चिमका सार्वजनिक भौतिक संरचनामा वा व्यक्तिगत सम्पत्तिमा भने कुनै पनि क्षति पुगेको छैन ।
सुर्खेत, जुम्ला, कालीकोट, मुगु र डोल्पामा सार्वजनिक र निजी सम्पत्तिमा क्षति पुर्‍याईएको छ । अनौपचारिक क्षेत्र सेवा केन्द्र (इनसेक) कर्णाली प्रदेशले आन्दोलनका क्रममा भएको क्षतिको अनुगमनपश्चात यी पाँच जिल्लामा अर्बौंको क्षति भएको सार्वजनिक गरेको छ ।
आन्दोलनमा सहभागी केही समूहले सुर्खेत, जुम्ला, कालिकोट, मुगु र डोल्पामा सरकारी कार्यालय, राजनीतिक दलका पार्टी कार्यालय र निजी निवासहरुमा तोडफोड र आगजनी गरी नोक्सानी पुर्‍याएका छन् । प्रदेशको राजधानी वीरेन्द्रनगरमा सबैभन्दा बढी क्षति भएको छ ।
इन्सेक कर्णाली प्रदेश कार्यालयले आन्दोलनपछि क्षतिग्रस्त भौतिक संरचना तथा अन्य क्षतिको विवरण सङ्कलन गरेको हो । इन्सेकले संकलन गरेको विवरणअनुसार सबैभन्दा बढी क्षति सुर्खेतमा भएको छ । त्यसमा पनि प्रदेशको राजधानी समेत रहेको वीरेन्द्रनगरका सार्वजनिक सम्पत्तिमा ठूलो क्षति भएको इन्सेक कर्णाली प्रदेश कार्यालयका संयोजक नारायण सुवेदीले बताए ।
हामीले क्षतिग्रस्त संरचनाहरुको प्रत्यक्ष अवलोकन गरेका छौं, त्यसअनुसार विवरण सम्बन्धित निकायलाई बुझाएका छौं,’ सुवेदीले भने, कर्णालीका सुर्खेतसहित पाँच जिल्लामा भौतिक रुपमा क्षति भएको छ, यसको पुनर्निर्माण गर्न अर्बौं रकम खर्च हुने देखिन्छ ।’
जेनजी आन्दोलनमा घुसेको केही समूहले जुम्लाको एउटा सरकारी कार्यालय, पाँच वटा पार्टी कार्यालयमा आगजनी र तोडफोड गरेका छन् । यस्तै आठ वटा सरकारी गाडी र ११ ओटा मोटरसाइकलमा पनि तोडफोड र आगजनी गरी क्षति पुर्‍याएका छन् । आन्दोलनकारीहरुले अत्यावश्यक सेवामा चल्ने एम्बुलेन्स, शववहान र दमकलमा समेत तोडफोड र आगजनी गरेको सुवेदीले बताए ।
कालिकोटमा नेपाली कांग्रेस, नेकपा एमाले, माओवादी केन्द्र, राष्ट्रिय स्वतन्त्र पार्टी, नेकपा (एकीकृत समाजवादी), नेपाल मजदुर किसान पार्टी र राष्ट्रिय प्रजातन्त्र पार्टी गरी सात वटा पार्टी कार्यालयमा आन्दोलनकारीले तोडफोडसँगै आगजनी गरेका छन् ।
सुवेदीका अनुसार मुगुमा कांग्रेस र एमालेको पार्टी कार्यालय तोडफोड गरिएको छ । आन्दोलनकारीले छाँयाँनाथ रारा नगरपालिकामा नगरप्रमुखको कार्यकक्ष भित्र पसेर तोडफोड गरेका छन् । कार्यकक्षभित्र राखिएको उच्च पदस्थ व्यक्तिका तस्विरहरु निकालेर फालिएको थियो । डोल्पाको त्रिपुरासुन्दरी नगरपालिका–१ त्रिपुराकोट बगरस्थित कांग्रेस नगर समितिको कार्यालय रहेको स्थानीयको घरमा आन्दोलनकारीले ढुंगामुढा गरेर तोडफोड गरेका थिए ।
सुर्खेतमा मात्र सरकारी, निजी तथा संस्थागत गरी ४४ वटा भौतिक संरचनामा क्षति पुगेको इनसेक कर्णाली प्रदेशले जनाएको छ ।
२८ वटा सरकारी, ८ वटा निजी, पाँच वटा राजनीतिक दलका पार्टी कार्यालय र तीन वटा अन्य संघसंस्थाका कार्यालयमा क्षति पुगेको हो । यी संरचनामध्ये केही सरकारी र निजीमा आगजनी र तोडफोड दुवै भएको छ भने संघसंस्था लगायतका कतिपय संरचनामा तोडफोड मात्र भएको छ ।
वीरेन्द्रनगरमा रहेको कर्णाली प्रदेश सभा, सिटी हल, वीरेन्द्रनगर नगरपालिकाको कार्यालय, नापी कार्यालय, प्रदेश लेखा नियन्त्रकको कार्यालय, जिल्ला समन्वय समितिको कार्यालय, सुर्खेत उपत्याका खानेपानी आयोजना कार्यालय, अख्तियार दुरुपयोग अनुसन्धानको कार्यालय, मुख्यमन्त्री तथा मन्त्रिपरिषदको कार्यालय, मुख्य न्यायाधिवक्ताको कार्यालयमा आन्दोलनकारीले क्षति पुर्‍याएका छन् ।
वीरेन्द्रनगर नगरपालिकाका वडा नम्बर २, ३, ४ र ६ कार्यालयहरुमा आगलागी र तोडफोड हुँदा पूर्णरुपमा क्षति भएको छ । वडा नम्बर १, ७, ८, ९, १० र ११ कार्यालयहरुमा आंशिक क्षति पुगेको छ ।
यस्तै उच्च सरकारी वकिलको कार्यालय, भेरी बबई डाइभर्सन बहुउद्देश्यीय आयोजना कार्यालय, उद्योग तथा उपभोक्ता हित संरक्षण निर्देशनालयको कार्यालय, कृष्ण संस्कृत तथा साधारण माध्यमिक विद्यालय, मुख्यमन्त्रीको सरकारी निवास, कृषिमन्त्री, भौतिक मन्त्रीका निवास, हिमाली पुस्तकालय, भैरवस्थानमा रहेको नेपाल रेडक्रस सोसाइटी उपशाखा भवनमा क्षति पुगेको छ ।
वीरेन्द्रनगरमा रहेका नेपाली कांग्रेस, नेकपा एमाले, माओवादी केन्द्र, राष्ट्रिय प्रजातन्त्र पार्टी र राष्ट्रिय जनमोर्चाको पार्टी कार्यालयमा तोडफोड र आगजनी भएका छन् । कांग्रेस उपसभापति पूर्णबहादुर खड्काको निवास, उनका भाई डा. डम्बर खड्का र विष्णु खड्काको निवास, विष्णु खड्काको पेट्रोल पम्प र फार्मेसी, मुख्यमन्त्री यामलाल कँडेलको निजी निवास, वीरेन्द्रनगर नगरपालिकाका नगरप्रमुख मोहनमाया ढकाल र उपप्रमुख नीलकण्ठ खनालको निजी निवासमा तोडफोडसँगै आगजनी गरी क्षति पुर्‍याईएको छ ।

आन्दोलनकारीहरुले प्रदेश सभामा रहेको एनआईसी एसिया बैंकको एटीएम समेत तोडफोडसँगै आगजनी गरेका छन् ।
सुर्खेतमा मात्र आन्दोलनकारीहरुले गरेको आगजनीका कारण ११ वटा सरकारी गाडी र आठ मोटरसाइकलमा क्षति पुगेको छ । निजी सवारीतर्फ दुई गाडी र पाँच वटा मोटरसाईकलमा क्षति पुगेको छ ।