सुर्खेत । कर्णाली प्रदेशमा विभिन्न क्षेत्रमार्फत उल्लेखनीय योगदान पुर्याएका १० जना युवालाई यस वर्ष ‘कर्णाली युथ आइकन अवार्ड’ प्रदान गरिने भएको छ । कर्णाली युवा महोत्सवको दोस्रो संस्करण अन्तर्गत उनीहरूलाई सम्मान गर्ने तयारी गरिएको आयोजकले जनाएको छ । महोत्सवका मूल संयोजक विनोद कुमार शाहीका अनुसार कर्णालीका युवाको प्रतिभा उजागर गर्ने, उनीहरूको क्षमता विकास गर्ने र सामाजिक रूपान्तरणमा सक्रिय युवालाई प्रोत्साहन गर्ने उद्देश्यले यो कार्यक्रम आयोजना गरिएको हो । महोत्सवले युवालाई केवल दर्शक नभई परिवर्तनका सक्रिय नेतृत्वकर्ताको रूपमा स्थापित गर्ने लक्ष्य लिएको उनले बताए ।
कार्यक्रममा मुख्य सल्लाहकार भुपेन्द्रजंग शाही र व्यवस्थापक संयोजक राजकुमार सिजापतीको संयोजनमा सम्पूर्ण तयारी अघि बढाइएको छ । आयोजकका अनुसार यो कार्यक्रम युवाहरूको साझा प्लेटफर्मका रूपमा विकास गर्दै कर्णालीका सबै जिल्ला तथा स्थानीय तहका युवालाई सहभागी गराउने लक्ष्य राखिएको छ । राजनीतिबाहेक शिक्षा, सामाजिक सेवा, उद्यमशीलता, खेलकुद, साहित्य, संस्कृति, नवप्रवर्तन तथा अन्य सिर्जनात्मक क्षेत्रमा सक्रिय रही समाजमा सकारात्मक प्रभाव पारेका युवालाई ‘कर्णाली युथ आइकन अवार्ड’ प्रदान गरिनेछ । यस अवार्डमार्फत उनीहरूको योगदानलाई औपचारिक रूपमा सम्मान गर्दै थप प्रोत्साहन दिने योजना रहेको आयोजकले बताएकाे छ ।
कर्णाली युवा महोत्सव यही वैशाख १९ र २० गते वीरेन्द्रनगरस्थित सिटी हलको प्राङ्गणमा आयोजना हुने भएको छ । पत्रकार सम्मेलन मार्फत आयोजकले तयारी पूरा भइसकेको जानकारी दिएको छ । संयोजक शाहीका अनुसार महोत्सवमा कर्णाली प्रदेशका सबै जिल्ला तथा स्थानीय तहबाट प्रतिनिधिमूलक रूपमा युवाहरूको सहभागिता सुनिश्चित गरिएको छ । कार्यक्रमलाई बहुआयामिक बनाउन विभिन्न गतिविधिहरू समावेश गरिएको छ । महोत्सवमा वक्तृत्वकला प्रतियोगिता, युथ प्लेटफर्ममार्फत अन्तरक्रिया, पुस्तक वार्ता, देउडा खेल, सांगीतिक तथा साहित्यिक प्रस्तुति जस्ता कार्यक्रमहरू सञ्चालन गरिनेछन् । यिनले युवाहरूको सिर्जनात्मक क्षमता उजागर गर्नुका साथै सांस्कृतिक पहिचानलाई पनि प्रवर्द्धन गर्ने अपेक्षा गरिएको छ ।
त्यसैगरी, कर्णालीको समृद्धिका लागि राज्यको दायित्व, जनप्रतिनिधि र युवाबीचको सम्बन्ध, मिडियामा कर्णालीको छवि, सामाजिक अभियान, समाज रूपान्तरण, पर्यटन प्रवर्द्धन, शिक्षा, स्वास्थ्य तथा पूर्वाधार विकास लगायतका विषयमा पनि विस्तृत छलफल गरिने आयोजकले जनाएको छ । महोत्सव मार्फत युवालाई नीति निर्माण, विकास प्रक्रिया र सामाजिक नेतृत्वमा सहभागी गराउने उद्देश्य लिइएको छ । गत वर्ष सम्पन्न पहिलो संस्करणबाट प्राप्त अनुभव, सिकाइ र सफलतालाई आधार मानेर यस वर्षको दोस्रो संस्करणलाई अझ प्रभावकारी, सहभागितामूलक र व्यापक बनाइने आयोजकाे भनाइ छ । आयोजकका अनुसार कर्णालीका युवालाई एउटै मञ्चमा ल्याएर उनीहरूको आवाज, विचार र क्षमता प्रस्तुत गर्ने अवसर दिनु नै महोत्सवको मुख्य उद्देश्य हो। यसले भविष्यमा कर्णाली प्रदेशको सामाजिक, आर्थिक र सांस्कृतिक विकासमा युवाको भूमिका अझ सशक्त बनाउन सहयोग गर्ने विश्वास व्यक्त गरिएको छ ।