त्यसैगरी, शिवालय गाउँपालिका–२ र ८ जोड्ने दुई पीपल सडक पुल निर्माण कार्य पनि सुरु गरिएको छ । रु तीन करोड १५ लाखभन्दा बढी लागतको २५ मिटर लामो पुल २०८५ वैशाखसम्म सम्पन्न गर्ने लक्ष्य छ । तर, सबै आयोजना सहज रूपमा अघि बढेका छैनन् । छेडाचाँदे–जुम्ला सडकखण्डको साल्मा खोलामा निर्माणाधीन पक्की पुल भने पाँच वर्षदेखि अलपत्र परेको छ । रु चार करोड ८८ लाख लागतको उक्त पुल निर्माणको जिम्मा पाएको कम्पनीले दुई वटा पिलर निर्माण गरेर काम रोकिएको हो । पूर्वाधार विकास कार्यालय जाजरकोटका अनुसार ठेक्का तोडिएपछि निर्माण कम्पनी अदालत गएको छ ।
पुल निर्माण नहुँदा जुनीचाँदे, कुशे र छेडागाड क्षेत्रका स्थानीयले यातायातमा सास्ती भोग्दै आएका छन् । विशेषगरी वर्षायाममा खोलाबाटै वारपार गर्नुपर्ने बाध्यता अझै कायम छ । प्रदेश सरकारले वर्षेनि बजेट विनियोजन गरे पनि निर्माण व्यवसायीको लापरवाहीका कारण कतिपय आयोजना समयमै सम्पन्न हुन नसकेको जनाइएको छ । स्थानीयवासीले अलपत्र आयोजनाप्रति सम्बन्धित निकायले कडा निगरानी र खबरदारी गर्नुपर्ने माग गरेका छन् ।