काठमाडौं । दसैं नजिकिएसँगै काठमाडौं उपत्यकाबाट आफ्नो जन्मथलो फर्किने यात्रुको चाप बढ्न थालेको छ। उपत्यकाका नयाँ बसपार्क, कलंकी, कोटेश्वर, बालाजु र बल्खुलगायतका क्षेत्रमा घर जाने यात्रुको भीड देखिन थालेको हो।
दसैं मनाउन परिवारसँग भेटघाट गर्ने र चाडपर्व मनाउने उत्साह बोकेर यात्रुहरू आ–आफ्नो गन्तव्यतर्फ लागिरहेका छन्। बालबालिका र सामानसहित यात्रामा निस्किएका यात्रुमा घर पुग्ने खुसी देखिए पनि लामो दूरीको यात्राले केही कठिनाइसमेत थपेको छ। कोही अग्रिम टिकट लिएर सार्वजनिक यातायातमा घर फर्किरहेका छन् भने केहीले रिजर्भ गाडीमार्फत यात्रा गरिरहेका छन्। कतिपय यात्रु भने गन्तव्यसम्म पुग्ने सवारीसाधनको खोजीमा बसपार्क र सडक आसपासमा प्रतीक्षा गरिरहेका देखिन्छन्।
यात्रुको चाप बढेसँगै बसपार्क तथा प्रमुख सडक र चोकहरूमा चहलपहल थपिएको छ। बसमा सिट पाउन यात्रुहरूलाई व्यस्तता बढेको छ भने यात्रुले भरिएका सवारीसाधन उपत्यकाबाट बाहिरिने क्रम जारी छ। दसैंका लागि घर फर्किनेको संख्या बढ्दै जाँदा काठमाडौं उपत्यकामा चाडपर्वको रौनकसँगै यात्रा व्यवस्थापनको व्यस्तता पनि बढेको छ। परिवारसँग दसैं मनाउने प्रतीक्षामा रहेका नागरिकहरू फूलपातीअघि नै घर पुग्ने तयारीमा जुटेका छन्। यस वर्ष दसैं कात्तिक ४ गते परेको छ भने फूलपाती असोज ३१ गते मनाइँदैछ। त्यसैले फूलपातीसम्म घर पुग्ने योजनासहित धेरै यात्रु आफ्नो गन्तव्यतर्फ लागिरहेका छन्।