कार्यदलमा सहमति नजुट्दा अन्योलमा प्रतिनिधि सभा बैठक

सहकारी ठगीसम्बन्धी संसदीय छानबिन समिति बनाउनेबारे टीओआर तय गर्न बसेको कार्यदलको बैठकमा सहमति नजुट्दा प्रतिनिधि सभाको बैठक अन्योलमा परेको छ।

प्रतिनिधि सभाको बैठक ४ः३० बजे भनिए पनि अझै बस्न सकेको छैन। त्यसअघि आज बिहान ११ बजे बस्ने भनिएको बैठक दिउँसो २ बजेलाई सारिएको थियो। बैठक २ बजे पनि बस्न नसकेपछि साढे चार बजे सारिएको थियो। तर अहिले पनि बैठक बस्न सकेको छैन।

संघीय संसद् सचिवालयका प्रवक्ता एकराम गिरीले कार्यदलको सहमति अनुसार बैठक बस्ने जानकारी दिए। उनले भने, ‘समय अझै बाँकी छ। कार्यदलको बैठक फेरि बसेको छ। त्यहाँबाट के सहमति हुन्छ। त्यो अनुसार प्रतिनिधि सभाको बैठक बस्ने नबस्ने तय हुन्छ।’

आज बिहानदेखि बसेको कार्यदलको बैठकमा सहमति जुट्न सकेको छैन। सत्तापक्ष र प्रतिपक्ष आ(आफ्नै अडानमा बस्दा सहमति नभएको हो।