दैलेख जिल्लाका जनप्रतिनिधिले स्थानीय, प्रदेश तथा सङ्घीय सरकारका निकायमा कार्यरत कर्मचारीले जोखिम मोल्न नचाहेका कारण विकासनिर्माणमा बाधा पर्ने गरेको बताएका छन् ।
अख्तियार दुरुपयोग अनुसन्धान आयोग कर्णाली प्रदेश कार्यालयले मङ्गलबार दैलेखमा आयोजना गरेको भ्रष्टाचार नियन्त्रण तथा सुशासन प्रवर्धन विषयक जिल्लास्तरीय अन्तर्क्रिया कार्यक्रममा बोल्ने अधिकांश जनप्रतिनिधिले काम गर्दैगर्दा अख्तियारमा उजुरी पर्ने र कर्मचारीले जोखिम मोल्न नचाहेका कारण आयोजनाको काम प्रभावित पर्ने गरेको बताएका छन् । नारायण नगरपालिकाका प्रमुख लोमन शर्माले स्थानीय तहमा रिसइबीका कारण अख्तियारमा उजुरी पर्ने र अख्तियारबाट पत्र पठाएपछि काम रोक्नुपर्ने बाध्यता रहेको बताए । उनले स्थानीय सरकारले काम गर्न खोज्दा पहिला नै अख्तियारमा उजुरी पर्ने र त्यसपछि कर्मचारीले नै जोखिम मोल्न नचाहने समस्याका कारण स्थानीय तहमा विकासका काममा ओझेल पर्ने गरेको बताए ।
भैरवी गाउँपालिकाका उपाध्यक्ष देवी भण्डारीले राम्रा काम गरौँ भनेर योजना तथा बजेट विनियोजन गरेको भए पनि कतिपय योजनाका विषयमा अख्तियारमा उजुरी दिने समस्याले स्थानीय तहमा समस्या हुने गरेको बताए । अख्तियारमा उजुरी परेपछि त्यसको टुङ्गो नलागेसम्म काम नगर्ने कर्मचारीको अडानका कारण स्थानीय तह समस्यामा छन् । स्थानीय तहमा कार्यरत कर्मचारीलाई कस्तो उजुरी हो त्यसले पछि आफूलाई समस्या पार्छ÷पार्दैन भन्ने कुरा जानकारी गराउनुपर्नेमा जोड दिए । अख्तियार दुरुपयोग अनुसन्धान आयोग कर्णाली प्रदेश सुर्खेतका प्रमुख रामकृष्ण पुडासैनीले तीन तहका सरकारबाट हुने काममा विभिन्न अनुदान वितरण, करार कर्मचारीका विषय, प्राकृतिक स्रोतसाधन दोहन, सार्वजनिक क्षेत्र अतिक्रमण, राहत वितरण, तालिम, गोष्ठी जस्ता काम, डिपिआर निर्माण, हाइटेक नर्सरी निर्माणलगायतका काममा अख्तियारमा उजुरी पर्ने गरेको बताए । उनले कुनै योजनाको काम सम्पन नहुँदै भुक्तानी दिने समस्याले स्थानीय तहमा उजुरीको सङ्ख्या बढ्दै गएको जानकारी दिए ।
निर्वाचित जनप्रतिनिधिले नीति, नियम र कानुन अनुसार काम गरेको खण्डमा अख्तियारमा उजुरी पर्दैमा समस्या नहुने उनले स्पष्ट पारे । अनुसन्धान प्रक्रियाका लागि रकम भुक्तानी रोक्नु भनेर पत्र नआएसम्म विकासका काममा कुनै पनि समस्या नमानेर काम गर्न र सम्बन्धित निकायलाई भुक्तानी प्रक्रियाका विषय अगाडि बढाउने विषयमा कहीँकतै अवरोध नहुने पनि उनको भनाइ छ । हालसम्म अख्तियार दुरुपयोग अनुसन्धान आयोगको कार्यालय सुर्खेतमा दैलेखका ३३३ उजुरी परेका छन् । तीमध्ये २१९ उजुरी फस्र्योट भइसकेका अख्तियार दुरुपयोग अनुसन्धान आयोगले जानकारी दिएको छ ।
Leave a Reply