१२ देशका नागरिकलाई अमेरिका प्रवेशमा पूर्ण रोक

अमेरिकी राष्ट्रपति डोनाल्ड ट्रम्पले केही देशका नागरिकहरूको प्रवेशमा प्रतिबन्ध लगाउने आदेशमा हस्ताक्षर गरेका छन्। ट्रम्पले बुधबार एउटा कार्यकारी आदेशमा हस्ताक्षर गरेका छन्, जसअनुसार सुरक्षा कारणले १२ देशका नागरिकहरूको अमेरिका प्रवेशमा पूर्ण प्रतिबन्ध वा कडाइ गरिएको छ।

यस आदेशअनुसार १२ देशका नागरिकहरूको अमेरिका प्रवेश पूर्ण रूपमा रोकिएको छ। अफगानिस्तान, म्यानमार, चाड, कंगो गणराज्य, इक्वेटोरियल गिनी, इरिट्रिया, हैटी, इरान, लिबिया, सोमालिया, सुडान र यमनका नागरिकलाई अमेरिका प्रवेशमा पूर्ण प्रतिबन्ध लगाइएको हो।

त्यस्तै, बुरुन्डी, क्युबा, लाओस, सिएरा लियोन, टोगो, तुर्कमेनिस्तान र भेनेजुएलालगायतका देशका नागरिकहरूलाई अमेरिका प्रवेशमा आंशिक रूपमा प्रतिबन्ध लगाइएको छ। अधिकारीहरूले भनेका छन्, ‘कानुनी रूपमा अमेरिका स्थायी आवास अनुमति (ग्रीन कार्ड) प्राप्त गरेका, हाल विद्यमान भिसा भएकाहरू तथा केही विशेष श्रेणीमा पर्ने व्यक्तिहरूलाई यस प्रतिबन्धबाट छुट दिइनेछ।’

व्हाइट हाउसकी प्रवक्ता एबिगेल ज्याक्सन भन्छिन्, ‘राष्ट्रपति ट्रम्प आफ्नो वाचा अनुसार अमेरिका र यहाँका जनतालाई ती खतरनाक विदेशी तत्वहरूबाट सुरक्षित राख्ने प्रयासमा छन्, जो यहाँ आएर हानि पुर्याउन सक्ने सम्भावना राख्छन्।’