सल्यानमा स्क्रबटाइफस परीक्षण गर्न किट अभाव

सल्यानको दार्मा गाउँपालिकाका ४९८ जनाको स्वास्थ्य परीक्षण गर्दा १ सय २८ जनामा स्क्रबटाइफस पोजिटिभ देखिएको छ । स्क्रबटाइफससँग मिल्दोजुल्दो लक्षणका साथै उच्च ज्वरोले असोज र कात्तिक पहिलो सातामा चार महिलाको मृत्यु हुनुका साथै पालिकाभर ज्वरोका विरामी बढेका छन् । दुई दिन शिविर र पाँच दिन घरघरमा गएर स्वास्थ्य परीक्षण गर्दा १ सय २८ मा स्क्रबटाइफस देखिएको गाउँपालिका स्वास्थ्य शाखा प्रमुख यज्ञबहादुर बस्नेतले बताए । जसमा ७० प्रतिशत महिलामा स्क्रबटाइफस देखिएको छ ।
स्वास्थ्य सेवा कार्यालयसँग समन्वय गरेर शिविर सञ्चालन गर्दा ५१, प्रदेश सरकारसँग समन्वय गरेर घरघरमा परीक्षण गर्दा ७३ र पालिकाको स्वास्थ्य संस्थामा परीक्षण गर्दा चार जनामा स्क्रबटाइफस देखिएको उनले बताए । ‘स्क्रबटाइफससँग मिल्दो लक्षणका साथै उच्च ज्वरोका कारण असोज र कात्तिक पहिलो साता चार महिलाको मृत्यु भए पनि पछिल्लो समयमा पोजिटिभ देखिएकालाई गाउँमै उपचार गर्न थालेपछि कसैले ज्यान गुमाउनपरेको छैन,’ बस्नेतले भने ।
गाउँघरमा अहिले पनि ज्वरोका बिरामी छन् । प्रदेश सरकारले खटाएका स्वास्थ्यकर्मीको टोली पनि आइतबार फर्किएको छ । स्क्रबटाइफस परीक्षणका लागि किटको अभाव रहेको उनले बताए । ‘अहिले स्वास्थ्यसंस्थामा उपचारका लागि आएका ज्वरोका बिरामीलाई परीक्षण गर्ने भनेर केही थान स्वास्थ्य संस्थालाई उपलब्ध गराएको छौं,’ उनले भने, ‘आइतबार एक टोली परीक्षण गर्न छुटेका केही स्थानमा खटिएको छ । किटको अभाव भएकाले त्यसपछि बिरामी भएका स्वास्थ्यसंस्था जानुपर्ने हुन्छ ।’
पालिका अध्यक्ष नीमबहादुर केसीले स्क्रबटाइफसले गम्भीर समस्या ल्याएको बताए । पछिल्लो समय स्क्रबटाइफका बिरामी घट्दै गए पनि जोखिम भने उत्तिकै रहेको उनको भनाइ छ । किटका लागि सम्बन्धित निकाय समक्ष माग गरिने उनले बताए ।