गर्मी बढेपछि वीरगञ्जका विद्यालय ३ दिनका लागि बन्द

वीरगञ्ज महानगरपालिकाले बढ्दो गर्मीका कारण विद्यालयहरू तीन दिनका लागि बन्द गर्ने निर्णय गरेको छ।

केहि दिनदेखि चर्को घाम र बढ्दो गर्मीका कारण बालबालिकाहरूको स्वास्थ्यमा प्रतिकुल प्रभाव परेको भन्दै महानगरपालिकाले जेष्ठ १६ गतेदेखि जेष्ठ १८ गतेसम्म सबै सामुदायिक र संस्थागत विद्यालयहरू बन्द गर्ने निर्णय गरेक हो।

सोमवार मेयर राजेशमान सिंहको उपस्थितिमा बसेको महानगरको शिक्षा समितिको बैठकले बुधवारदेखि शुक्रवारसम्म तीन दिनका लागि विद्यालयहरू बन्द गर्ने निर्णय गरेको बताइएको छ।

गर्मी अत्यधिक बढेका कारण विद्यार्थीहरू कक्षाकोठामै मुर्छित हुने अवस्था आएको भन्दै अभिभावकहरूको गुनासो अनुसार गर्मी विदा दिइएको हो।

अहिले पर्सा, बारा, रौतहट लगायत देशभर कै जिल्लाहरूमा तापक्रम ४० देखि ४३ डिग्रीसम्म पुगेका कारण सबैलाई सतर्कता अपनाउन चिकित्सकहरूले आग्रह गरेका छन्।