सडकसँग जोडियो डोल्पा अस्पताल

ठूलीभेरी नदीमाथि बनाईएको बेलिब्रिजको उद्घाटनपश्चात डोल्पा जिल्ला अस्पताल सडकको पहुँचमा पुगेको छ । बुधबार कर्णाली प्रदेशका मुख्यमन्त्री यमलाल कँडेलले जिल्ला अस्पताल जोड्ने भेरी नदीमाथिको बेलिब्रिज पुल उद्घाटन गरेका छन् । कर्णाली प्रदेश सरकार भौतिक पूर्वाधार मन्त्रालयको बजेटबाट ठूलीभेरी नदीमा निर्माण भएको उक्त पुलको मुख्यमन्त्री कँडेलले उद्घाटन गरेका हुन् ।
मुख्यमन्त्री कँडेलले सकारात्मक सोच र सामूहिक प्रयासले मात्रै विकास गर्न सकिने बताए । बजेट भएर मात्रै विहास नहुने भन्दै उनले सबैले आ–आफ्नो तर्फटबाट प्रयास गर्नुपर्ने बताए । यस्तै प्रदेशका भौतिक पूर्वाधार तथा शहरी विकास मन्त्री शेरबहादुर बुढाले बेलिब्रिज पुल निर्माणपछि अस्पताल मात्र नभई फोक्सुण्डो ताल पुग्ने पर्यटकका लागि सहज हुने बताए ।
४ करोड १७ लाखमा बनेको उक्त पुल जिल्लामै सबैभन्दा लामो बेलिब्रिज भएको र यसले जिल्ला अस्पतालसँगै हेलिप्याडसम्म सडक जोड्ने भौतिक पूर्वाधार कार्यालय डोल्पाका प्रमुख टेक हितानले बताए । निर्माणको जिम्मा रिडार्क नेपालले लिएको हो । काम सुरु गरेको साढे पाँच महिनामै काम सम्पन्न भएको थियो । ‘कार्यालयको चासो, समन्वय र सक्रियता भयो भने छोटो समयमै धेरै काम गर्न सकिन्छ भन्ने उदाहरणको रुपमा यो पुल बनेको छ,’ उनले भने । जिल्ला सदरमुकामसम्म मोटरबाटो पुगेर पनि पुल नहुँदा दुर्गमजस्तै भएको जिल्ला अस्पताल अब भने सहज हुने स्वास्थ्य सेवा कार्यालय डोल्पाका प्रमुख डाक्टर सिजन रावलले भनाई छ ।
यस्तै मुख्यमन्त्री कँडेलले आजै स्वर्गीय क्याप्टेन दिनेश न्यौपानेको शालिक पनि उद्घाटन गरेका छन् । न्यौपानेको शालिक सदरमुकाम दुनैको प्रवेशद्वारमै बनाइएको छ । २०७२ सालमा कालिकोटमा भएको काष्ठमण्डप एयरको जहाज दुर्घटनामा उनको मृत्यु भएको थियो । उनको उडानमा सवार नौ जना यात्रु भने सकुशल रहेका थिए ।