सुर्खेत । सुर्खेतकी १६ वर्षीया इनिशा विकको मृत्यु प्रकरणमा पक्राउ परेका चार जना नाबालकलाई पुर्पक्षका लागि थुनामा राख्न अदालतले आदेश दिएको छ ।
जिल्ला अदालत सुर्खेतका बाल इजलासका न्यायाधीश दीपक ढकालले उक्त आदेश जारी गर्दै अनुसन्धान पूरा नहुँदासम्म चारै जना बालकलाई थुनामै राखेर मुद्दा अघि बढाउन निर्देशन दिएका हुन् ।
अदालतको आदेशअनुसार उनीहरूलाई बालसुधार गृहमा पठाइने भएको छ । अदालतका सूचना अधिकारी उज्वल रावलका अनुसार घटनाको गम्भीरता तथा प्रारम्भिक प्रमाणका आधारमा यस्तो निर्णय गरिएको हो ।
इनिशा विक गत फागुन २३ गते वीरेन्द्रनगर नगरपालिका–४ स्थित जनजागरण सामुदायिक वन क्षेत्रमा अचेत अवस्थामा फेला परेकी थिइन् ।
उनलाई तत्काल उपचारका लागि अस्पताल लगिए पनि चिकित्सकले मृत घोषणा गरेका थिए ।
घटनापछि जिल्ला प्रहरी कार्यालय सुर्खेतले अनुसन्धान गर्दै चार जना नाबालकलाई नियन्त्रणमा लिएको थियो ।