सुर्खेत । लामो समयदेखि पटकपटक मिति तोकिँदै स्थगित हुँदै आएको दशौँ राष्ट्रिय खेलकुद प्रतियोगिताका लागि नयाँ मिति तय गरिएको छ । राष्ट्रिय खेलकुद परिषद् (राखेप) को बिहीबार बसेको १२५औँ बोर्ड बैठकले दशौँ राष्ट्रिय खेलकुद आगामी मंसिर १६ देखि २९ गतेसम्म आयोजना गर्ने निर्णय गरेको हो । दशौँ राष्ट्रिय खेलकुद प्रतियोगिता कर्णाली प्रदेशमा आयोजना गर्ने निर्णय यसअघि नै भइसकेको छ ।
तर पटकपटक मिति तोकिए पनि पूर्वाधार, आर्थिक स्रोत, प्रशासनिक तयारीलगायत विभिन्न कारणले प्रतियोगिता सञ्चालन हुन सकेको छैन । नयाँ मिति तय भएसँगै यसपटक भने प्रतियोगिता निर्धारित समयमै हुने अपेक्षा गरिएको छ । राखेप बोर्ड बैठकमा सहभागी एक सदस्यका अनुसार दशौँ राष्ट्रिय खेलकुदका लागि मंसिर १६ देखि २९ गतेसम्मको समय तय गरिएको हो । उनका अनुसार प्रतियोगिता सञ्चालनका लागि आवश्यक तयारीलाई अब तीव्रता दिनुपर्ने अवस्था छ ।
दशौँ राष्ट्रिय खेलकुदको आयोजना कर्णाली प्रदेशका लागि विशेष महत्वको विषय हो । प्रदेशमै पहिलोपटक ठूलो राष्ट्रिय खेलकुद प्रतियोगिता आयोजना हुने भएकाले यसलाई कर्णालीको खेल क्षेत्रको विकाससँगै पूर्वाधार निर्माण र खेलाडी उत्पादनका दृष्टिले समेत महत्वपूर्ण अवसरका रूपमा हेरिएको छ ।
पटकपटक स¥यो प्रतियोगिता
दशौँ राष्ट्रिय खेलकुद प्रतियोगिता आयोजना गर्ने घोषणा नवौँ राष्ट्रिय खेलकुदको समापनकै क्रममा गरिएको थियो । २०७९ कात्तिक,मंसिरमा गण्डकी प्रदेशमा सम्पन्न नवौँ राष्ट्रिय खेलकुदको समापनका क्रममा दशौँ राष्ट्रिय खेलकुद २०८१ मंसिरमा कर्णाली प्रदेशमा आयोजना गर्ने घोषणा गरिएको थियो ।
तर तोकिएको समयमा कर्णालीका खेल पूर्वाधार पूर्ण रूपमा तयार नभएपछि प्रतियोगिता सञ्चालन हुन सकेन । त्यसपछि प्रतियोगिताको मिति पटकपटक परिवर्तन हुँदै आएको छ । पहिलोपटक तोकिएको मितिमा प्रतियोगिता हुन नसकेपछि २०८१ चैत २३ देखि ३० गतेसम्म आयोजना गर्ने निर्णय गरिएको थियो । तर उक्त मितिमा पनि प्रतियोगिता सञ्चालन हुन सकेन ।
त्यसपछि पुनः २०८२ जेठ ३ देखि १० गतेसम्म प्रतियोगिता गर्ने निर्णय भयो । तयारी पूरा नभएपछि त्यो मिति पनि कार्यान्वयनमा आउन सकेन । चौथोपटक फागुन १ देखि ७ गतेसम्म प्रतियोगिता सञ्चालन गर्ने तयारी गरिएको थियो । तर आर्थिक स्रोतको अभाव देखाउँदै उक्त समयमा पनि प्रतियोगिता आयोजना हुन सकेन । त्यसपछि राखेपले पुनः जेठमा प्रतियोगिता सञ्चालन गर्ने निर्णय गरेको थियो । तर विभिन्न कारणले जेठको प्रस्तावित मितिमा समेत दशौँ राष्ट्रिय खेलकुद आयोजना हुन सकेन ।
निर्णय फेरिए, प्रतियोगिता भएन
दशौँ राष्ट्रिय खेलकुदको मिति तोक्ने र सार्ने क्रमसँगै प्रतियोगिता आयोजना हुने विषयमा अन्योलसमेत बढ्दै गएको थियो । पछिल्लो चरणमा तत्कालीन युवा तथा खेलकुदमन्त्री बब्लु गुप्ताले २०८२ फागुनमा प्रतियोगिता आयोजना गर्ने निर्णय गरेका थिए ।
तर प्रतियोगिता आयोजना हुनुअघि नै मन्त्री गुप्ताले पदबाट राजीनामा दिएर निर्वाचनमा जाने तयारी गरेपछि उक्त निर्णयअनुसार पनि प्रतियोगिता सञ्चालन हुन सकेन । यसरी पूर्वाधार, बजेट, प्रशासनिक तयारी र नेतृत्व परिवर्तनलगायत कारणले दशौँ राष्ट्रिय खेलकुद पटकपटक अन्योलमा पर्दै आएको छ । प्रतियोगिताको मिति पटकपटक तोकिए पनि कार्यान्वयन हुन नसक्दा खेलाडी, प्रशिक्षक, खेल संघ तथा आयोजक प्रदेशमा समेत निराशा बढेको थियो ।
कर्णालीको तयारीमा चुनौती
अब मंसिर १६ देखि २९ गतेसम्म प्रतियोगिता सञ्चालन गर्ने निर्णय भएपछि कर्णाली प्रदेशले बाँकी तयारीलाई तीव्र बनाउनुपर्ने देखिएको छ । प्रतियोगिता सञ्चालनका लागि आवश्यक खेल मैदान, खेलाडीको आवास, यातायात, सुरक्षा, स्वास्थ्य सेवा तथा अन्य व्यवस्थापनका काम समयमै पूरा गर्नुपर्ने चुनौती छ ।
कर्णाली प्रदेशमा दशौँ राष्ट्रिय खेलकुदका लागि केही खेल पूर्वाधार निर्माण तथा स्तरोन्नतिको काम भए पनि सबै पूर्वाधार पूर्ण रूपमा तयार भइसकेका छैनन् । यसअघि पूर्वाधारकै कारण प्रतियोगिता सारिएको पृष्ठभूमिमा अब बाँकी काम तोकिएको समयभित्र सम्पन्न गर्नु प्रदेश सरकार, प्रदेश खेलकुद विकास परिष्द, र राखेप तथा सम्बन्धित निकायका लागि मुख्य चुनौती हुनेछ ।
राष्ट्रिय खेलकुद प्रतियोगिता कर्णालीमा आयोजना हुनु प्रदेशको खेल क्षेत्रका लागि ठूलो अवसर पनि हो । प्रतियोगिताले कर्णालीका खेलाडीलाई राष्ट्रियस्तरमा आफ्नो प्रतिभा प्रदर्शन गर्ने अवसर प्रदान गर्नुका साथै खेल पूर्वाधार विकास, पर्यटन प्रवद्र्धन र आर्थिक गतिविधि बढाउनसमेत सहयोग पु¥याउन सक्छ ।