आगामी २१ फागुनमा सम्पन्न हुने प्रतिनिधिसभा सदस्यका लागि नेपाली कांग्रेसले उम्मेदवार छनोटलाई तीव्रता दिएको छ । यसअघि सँधै अन्तिममा उम्मेदवार छान्ने काँग्रेसले यसपटक सुरुमै यो काम गर्दैछ । कर्णाली प्रदेशका पनि विभिन्न जिल्लाहरुमा उम्मेदवार छनोटका लागि छलफल भईरहेका छन् । काँग्रेसले सुर्खेतका भने दुवै निर्वाचन क्षेत्रमा उम्मेदवारहरु सिफारिस गरिसकेको छ । नेपाली कांग्रेस कर्णाली प्रदेशसमितिका प्रवक्ता दमन शाहीका अनुसार कर्णालीका १० वटै जिल्लामा उम्मेदवार छनोटको कार्य जारी छ । ‘केन्द्रकोे परिपत्र अनुसार एक निर्वाचन क्षेत्र भएको जिल्लामा २५ गतेसम्म र एक भन्दा बढी निर्वाचन क्षेत्र भएका जिल्लामा २६ गतेसम्म उम्मेदवार सिफारिस गरी प्रदेश कार्यसमितिमा पठाइ सक्नुपर्ने छ, सोही अनुसार यहाँका सबै जिल्लामा छलफल जारी छ,’ शाहीले भने, ‘२६ गतेसम्म सबै जिल्लाको सिफारिस भएर आइसक्छ ।’
मंगलबार नै सुर्खेतमा प्रत्यक्ष र समानुपातिकतर्फका उम्मेदवारहरु जिल्ला कार्यसमितिबाट सिफारिस गरिएको हो । जसअनुसार क्षेत्र नम्बर १ बाट नेपाली काँग्रेसका कार्यवाहक सभापति पूर्णबहादुर खड्का प्रत्यक्षतर्फको निर्वाचनका लागि एकल सिफारिस भएका छन् । उनी काँग्रेसबाट यो क्षेत्रमा फेरि निर्विकल्प उम्मेदवार बन्दैछन् । उनी विगत २०४८ देखि यताका एउटाबाहेक हरेक निर्वाचनबाट यही क्षेत्रबाट सांसद बनेका छन् । २०६४ को निर्वाचनमा समानुपातिक प्रणालीबाट सांसद बनेका उनी अरु सबैमा प्रत्यक्ष निर्वाचित हुन् । विगतदेखि नै खड्का सुर्खेत क्षेत्र नम्बर १ बाट पार्टीमा निर्विकल्प उम्मेदवार रहीआएका थिए । यसपटक पनि उनको नाम एकल नै सिफारिस भयो ।
२०७९ सालमा सम्पन्न प्रतिनिधिसभा निर्वाचनमा सुर्खेत क्षेत्र नम्बर १ बाट खड्का निर्वाचित भएका थिए । कांग्रेस–माओवादी गठबन्धनबाट उम्मेदवार बनेका खड्काले नेकपा एमालेका ध्रुवकुमार शाहीलाई फराकिलो मतान्तरले पराजित गरेका थिए । खड्काले ४२ हजार ६ सय ७ मत ल्याएर विजयी हुँदा एमालेका शाहीले ३० हजार ९ सय ८८ मत ल्याएर पराजित भएका थिए ।
यस्तो छ खड्काको राजनीतिक यात्रा
पूर्णबहादुर खड्का विगतदेखि पार्टी सभापति शेरबहादुर देउवाका विश्वासपात्रका रुपमा हेरिन्छन् । २०१० सालमा सुर्खेतमा जन्मिएका खड्काले २०३१ सालबाट राजनीतिक यात्रा सुरु गरेका थिए । खड्का २०३४ सालमा नेपाली काँग्रेस सुर्खेतको सभापति बनेका थिए । त्यतिबेला उनी जम्मा २४ वर्षका थिए । पञ्चायतकालको प्रतिबन्धित अवस्थामा पनि उनी निरन्तर राजनीतिमा सक्रिय रहे । नेपाल विद्यार्थी संघमा केन्द्रीय सदस्य हुँदै खड्का हाल पार्टीको उपसभापतिसम्म भए ।
२०३६ सालमा खड्का सुर्खेतको वीरेन्द्रनगर नगरपालिकाको मेयर निर्वाचित भएका थिए । जिल्ला अदालत सुर्खेतले मेयर भएको ६ महिनामै उनलाई अपदस्थ गरिदिएको थियो । विभिन्न समयमा गरेर पाँच महिनाभन्दा बढी जेल जीवन बिताएका खड्का सुर्खेतको निर्वाचन क्षेत्र नम्बर १ बाट चार पटक प्रत्यक्ष निर्वाचित भएका थिए । एकपटक भने उनी पराजित भए । २०४८, २०५१, २०५६ सालमा निरन्तर उनी प्रत्यक्ष निर्वाचनर्फात चुनाव जितेर सांसद भएका थिए । २०६४ सालमा खड्का समानुपातिक निर्वाचन प्रणालीमार्फत सांसद बने । २०७० सालमा भएको प्रतिनिधि सभा निर्वाचनमा भने उनी पराजित भएका हुन् । उनको निरन्तर संसद यात्रामा त्यहीबेला ब्रेक लागेको थियो ।
नेपाली काँग्रेसको दशौं महाधिवेशनबाट खड्का केन्द्रीय सदस्य मनोनित भएका थिए । २०५९ मा काँग्रेस विभाजन भएपछि बनेको काँग्रेस प्रजातान्त्रिकमा उनी केन्द्रीय सदस्य बने । काँग्रेस प्रजातान्त्रिकको ११ औं महाधिवेशनमा उनी केन्द्रीय सदस्यमा निर्वाचित भए । २०६४ मा काँग्रेस र काँग्रेस प्रजातान्त्रिकबीच एकीकरणपछि भएको १२ औं महाधिवेशनमा पनि खड्काले केन्द्रीय सदस्य जितेका थिए । त्यहीबेला उनी सहमहामन्त्रीमा मनोनित भएका थिए ।
१३ औं महाधिवेशनपछि खड्का महामन्त्रीमा मनोनित भएका थिए । १४ औं महाधिवेशनमा उनी काँग्रेसको निर्वाचित पहिलो उपसभापति बन्न सफल भएका हुन् । २३–२४ को जेन–जी आन्दोलनपछि खड्कालाई कार्यवहाक सभापति बन्ने अवसरसमेत जुरेको थियो ।
